الدرس ١١: إنشاء البرامج (١)

إنشاء برنامج بإسم converter

إنشاء البرامج (١)

١- افتح برنامج المفكرة (notepad).

إذا ما عرفت كيف،

اضغط هنا

١- اضغط زر ابدأ.

٢- اكتب في خانة البحث notepad.

إذا ما طلعلك شي، اكتب notepad.exe



٢- اكتب هذا 👇 في المفكرة:



set /p m=Enter a number of minutes:

set /a s=%m%*60

echo %s%

pause

٣- اضغط على كلمة ملف (تلقاها فوق في الزاوية اليمين إذا كمبيوترك بالعربي).

٤- اختار حفظ بإسم.

٥- اضغط على Text Documents (*.txt)

٦- اختار All Files.

٧- غير إسم الملف لـ converter.bat

٨- اضغط على سطح المكتب.

حَــنِــنْـــشِئ برنامج يحول الدقايق لثواني وحنحفظه في سطح المكتب


٩- اضغط زر حفظ.

١٠- روح للملف في سطح المكتب إسمه converter.

ملاحظة: إذا ما طلع لك البرنامج على سطح المكتب، اضغط على سطح المكتب بزر الماوس اليسار بعدها اضغط F5.

F5 Key (top of the keyboard)
( زر F5 )


١١- شغل البرنامج.

١٢- حط أي رقم كمدخل.

مبروك! 😎👍 سويت برنامج ياخذ عدد الدقايق كمُدْخل ويعطيك عدد الثواني كمُخْرج.

تقدر تسوي أي برنامج يحول رقم لرقم ثاني.

١٣- اضغط زر يمين على برنامج converter.

١٤- اختار تحرير.

١٥- أبغاك تعدل على البرنامج وتخليه ياخذ أي رقم ويضربه في ١٠٠ بعدها يعطيك حاصل الضرب.

هذا البرنامج يحول الأمتار لـ سانتي مترات (أظن أنك أخذتها في مادة العلوم).

ليه نسوي البرامج؟

من خلال عملي، شفت فائدة وحدة:

  • تسريع أداء المهام.

البرنامج إللي يحول الدقايق لثواني أفضل من الآلة الحاسبة. إذا فتحت الآلة الحاسبة، حتضغط أكثر من زر حتى تحول الدقايق لثواني.

برنامجنا أسرع. حأقولك ليه:

  • برنامجنا موجود على سطح المكتب (يعني تقدر تفتحه بسرعة).
  • تشغله بضغطتين بس.
  • تحط عدد الدقايق إللي تبغاها بعدها تضغط Enter ويحول لك الدقايق لثواني.

أما الآلة الحاسبة، فلازم تمشي مع هذي الخطوات:

  • ١- تضغط زر ابدأ.
  • ٢- تكتب calc في خانة البحث.
  • ٣- تضغط Enter أو تختار الآلة الحاسبة من القائمة.
  • ٤- تضغط على أزارير الآلة الحاسبة (عن طريق الماوس أو الكيبورد) حتى تحول الدقايق إللي في بالك لثواني.

وأبشرك! حنسوي حاجات أكبر من كذا مثل ما وعدتك في الدرس السابع. بس هذا في الدروس الجاية. بس لازم تتعلم الأساسيات.

حتى المحترف ما ينسى الأساسيات!

أمشي مع الدروس وحتصير خطير جداً. 😎

إنشاء البرامج (١)